Despois de ver e pasear pola Muralla, o viaxeiro curioso debe lembrar que o Lugo romano é algo máis que esta fortificación. Debaixo da cidade actual escóndese a antiga Lucus Augusti. A gran cantidade de restos arqueolóxicos atopados confírmana como unha auténtica cidade romana, xa que presenta os seus elementos definidores (foro, calzadas, termas, templos, necrópoles, acueduto...).
Parte destes restos están musealizados e poden verse dentro da ruta de Lugo romano que fai un percorrido polo Centro Interpretación da Muralla, o Museo Provincial, a Casa de Mosaicos, Centro Arqueolóxico San Roque, a Muralla Romana de Lugo, a Sala de Exposicións Porta Miñá, as Termas Romanas e a ponte de orixe romana. Xa a 14 quilómetros de Lugo, atopamos o misterioso santuario tardorromano de Santalla de Bóveda e a uns 20 quilómetros en dirección a Meira temos o Castro de Viladonga, importante aldea fortificada que tivo na época romana o seu máximo esplendor.

Inicio: Oficina Municipal de Turismo, sita na Praza do Campo Nº 11

Percorrido:Centro Interpretación da Muralla - Museo Provincial - Casa dos Mosaicos - Centro Arqueolóxico San Roque - Muralla Romana de Lugo - Sala Porta Miñá - Termas Romanas - Ponte Romana - Santalla de Bóveda.

[versión imprimible]