É un modelo de xestión da calidade deseñado pola Secretaría de Estado de Comercio e Turismo e a Federación Española de Municipios e Provincias (FEMP) que se vén aplicando xa en máis de 62 comarcas e concellos de toda España e que continúa ampliando o seu ámbito de acción. O SICTED caracterízase por levar a cabo unha xestión coordinada do destino, a aplicación conxunta intersectorial de parámetros de calidade e a incorporación neste proxecto de subsectores non necesariamente turísticos, pero si relacionados coa calidade no destino.
Os servizos e empresas onde se aplica este sistema non son só aqueles tradicionalmente considerados turísticos, senón tamén outros moitos que o cidadán emprega a cotío (comercios, bares, restaurantes...), polo que as melloras obtidas serán tamén claramente percibidas pola poboación local.
Aquelas organizacións que ao remate do proceso de implantación teñan acadados os niveis mínimos que o sistema esixe, recibirán o dereito ao uso e exhibición dun distintivo que os identifica como establecemento de calidade. |
